2-nji iýunda Stambulda Ukraina bilen Russiýanyň wekiliýetleriniň arasynda, Ukrainadaky ýaragly çaknyşygy bes etmegiň şertleri boýunça, gepleşikleriň täze tapgyry geçirildi.
Türkiýäniň mediasy ýurduň Daşary işler ministrliginiň wekiline salgylanyp, duşuşygyň “negatiw görnüşde geçmändigini” habar berdi.
Ukrainanyň prezident diwanynyň ýolbaşçysy Andriý Ýermak duşuşykda rus tarapyna Ukrainadan zor bilen alnyp gidilen ýüzlerçe çaganyň ady görkezilen sanawy gowşurandygyny aýtdy. Bu çagalar Russiýanyň gözegçiligindäki sebitlerde saklanýar we Kiýew olaryň yzyna gaýtarylmagyny talap edýär.
Ukrainanyň prezidenti Wolodymyr Zelenski Russiýanyň we Ukrainanyň, Türkiýäniň araçylyk etmeginde, urşy bes etmek baradaky öz garaýyşlaryny beýan edýän resminamalary birek-birege gowşurandyklaryny aýtdy. Duşuşykda ýesirleriň nobatdaky alyş-çalşygyny geçirmek baradaky mesele hem maslahatlaşyldy. Mundan öň Stambulda geçirilen gepleşikleriň netijesinde “müňe-müň” formatda ýesir çalşygy amala aşyrylypdy.
Gepleşikleri, duşuşyga araçylyk eden, Türkiýäniň daşary işler ministri Hakan Fidan açdy. Gepleşikler ýapyk gapylaryň aňyrsynda geçirildi. Fidanyň sözlerine görä, taraplar ýesir çalşygy, ok atyşlygy bes etmek boýunça şertleri we iki ýurduň prezidentleriniň duşuşygynyň mümkinçiligi ýaly meselelere garamalydy.